मंगला खंडागळे - सावळ्या रे मेघराजा तुझं ल...

सावळ्या रे मेघराजा
तुझं लोभस रुपडं
तुझी संथ बरसात
भरे मोद चोहीकडं

जणू धरतीचं बाळ
प्राशी धार चुटचुट
देतो तृप्तीचा आनंद
अभिषेक अखंडित

जणू वारीच निघाली
हाती घेऊन चिपळ्या
लागे दर्शनाची ओढ
पाने वाजवती टाळ्या !

राने हिरवी हिरवी
मने झाली चिंब चिंब
चिंब घरट्यात माय
देते पिलासाठी ऊब

थेंबाथेंबात दडली
तुझी प्रीत अनामिक
किती साठवून घ्यावा
असा थेंब एक एक !