पूर्वी म्हाळगी - बदलत्या ऋतूमधला पहिला मोग...

बदलत्या ऋतूमधला
पहिला मोगर्‍याचा गजरा
तुझ्या कोवळ्या हातांनी
माझ्या हातात पडतो

आणि माझा जीव उमलतो...

घरातल्या बोलक्या कोपर्‍यातून
घुंगराच्या आवाजात
गत - निकास जगोजागी घुमतो

आणि माझा जीव रुणझुणतो...

कवितेच्या पुस्तकात
बुडून जातं घर
स्वप्नाळू शब्दांना उचलत तू म्हणतेस :
‘ कित्ती सुंदर ओळ ’

अन् माझा जीव मोरपीस होतो...

आरशात डोकावतात
केसामधले चंदेरी क्षण
डोळ्यांखालची काळी वर्तुळं
कवितेच्या शब्दाशी
अडखळतं मन

आणि माझा जीव तुझ्यात नवकोरा सापडतो... !