हरिश्चंद्र पाटील - ‘ बायकूला आखिरपत्तोर साथ ...

‘ बायकूला आखिरपत्तोर साथ देईन...
सुखाचा संसार करीन ’
अशी शपथ त्यानं
लग्नात सप्तपदी घालताना
मोठ्या विश्वासानं घेतली होती...

दुष्काळ पडला
कर्ज काढलं
कर्ज फिटंना
व्याज वाढलं

गड्याचं दगडावानी बळकट काळीज
मेणावानी वितळलं
फास करून दावं फांदीला बांधलं
सुखी संसाराचं स्वप्न झाडाला टांगलं

बायको रडली...पडली
आणि रडत रडताच
तिचं मेणावानी काळीज
दगडावानी घट्ट झालं !